Gobernantza eta KSIak
Garapen eredu eta politika gobernantza berritzaile eta eraginkorragoen garapena KSIetan, ikuspegi holistiko eta gurutzatutako berrikuntzatik abiatuta, garapen ekonomiko jasangarria lantzen duten bitartean.
Erakunde koordinatzailea
Erronkak
Erronka 1
Berrikuntza-ereduak KSIetako gobernantzarako nazioarteko politiketan
Erronka 2
KSIetako politikak ebaluatzeko sistemak
1. ATaren barruan CWF24 topagunerako hautatutako amaierako kasuak: gobernantza eta KSIak
MUSEOAK ETA ONGIZATEA - PRESKRIPZIO KULTURALA
1. erronka
berrikuntza-ereduak KSIetako gobernantzarako nazioarteko politiketan
Erakunde
Harremanetarako pertsona
Raquel Barata (arbarata@museus.ulisboa.pt)
Jatorria
Museoek gizartearen egungo erronkak gorabehera ondarearen eta ongizatearen arteko lotura bat sortzeko boterea daukate. Azken hamarkadan, museoek xede terapeutikoekin duten eginkizun soziala azpimarratu da, alegia, medikuak aginduta erabiltzaileei museoetan zeregin okupazionalak eskaintzeko aukera. Beraz, museoek eta lorategi botanikoek gizarte-elkarrekintza erraztu dezakete eta autoestimua eta nortasuna sustatzeko eta bakartze-maila eta antsietatea murrizteko esperientzia lasaigarriak eskain ditzakete. Ikuspegi berri horri preskripzio kultural deitu zaio: Historia Naturalaren eta Zientziaren Museo Nazionalak (Portugal) Lisboan preskripzio-ekimenak aplikatzeko sare bat jarri zuen abian, museoko eta lorategi botanikoko bildumak erabiliz.
Ibilbidea
Lisboako Unibertsitateko Historia Naturalaren eta Zientziaren Museo Nazionala «Museoak eta ongizatea – Preskripzio kulturala» proiektua garatzen ari da, entitate nazionalekin elkarlanean, Portugalgo museoak eta lorategi botanikoak preskripzio kulturalerako prestatzeko asmoz. Proiektua gazteen inklusioa eta erakarpena sustatzen dituzten unibertsitate-ikasleei zuzenduta dago, baina tokiko osasun-zentroen erabiltzaileentzako eta hurbileko erkidegoetako eguneko zentroetako adineko pertsonen taldeentzako preskripzio kulturaleko esku-hartzeak ere hartzen ditu barne.
Museoentzat, preskripzio kulturala abian jartzeak dakarren erronka da esku-hartzeak terapia gisa agintzen dituzten mediku eta psikologoekin batera gauzatu ditzaketen pertsonak sartu behar dituztela plantillan. Zeregin hori museoetako hezkuntza-zerbitzuei esleitu zaie, askotariko jendearekin lan egiteko esperientzia eta gaitasunak dauzkaten profesionalak dituztelako. Hala ere, prestakuntza eta espezializazioa beharrezko eta premiazko alderdiak dira.
Inpaktu positiboa
Proiektuaren inpaktua parte-hartzaileen arteko ikuspegi kualitatibo baten bidez adierazten da. 2022ko martxotik 2023ko maiatzera arte, higadurako eta antsietateko koadroa zuten bost unibertsitate-ikaslek, depresioko eta antsietateko diagnostikoa zuten osasun-zentroetako lau pazientek eta bakartze sozialeko eta depresioko profila zuten eguneko zentroetako adineko 22 pertsonak hartu zuten parte proiektuan.
Parte-hartzaileoi egindako elkarrizketen emaitzek erakusten dute preskripzio kulturaleko ekimenei esker ongizate handiagoa lortu zutela. Unibertsitate-ikasleen artean estresa murriztu eta lehia eta gozamena sustatu zituzten, osasun-zentroetako pazienteen artean autokonfiantza, lehia eta gizarte-inplikazioa areagotu zituzten eta adineko pertsonen artean gizarte-inplikazioa, gozamena eta lekuarekiko atxikimendua bultzatu zituzten.
Hazkuntza eta lankidetza
Aurreikusten da gai honi buruzko ikerketan diharduen nazioko eta nazioarteko komunitate akademikoak nabarmen hartuko duela parte «Museoak eta ongizatea» proiektuan, inpaktu-ebaluazioen garapena barne. 2024an, Lisboako Historia Naturalaren eta Zientziaren Museo Nazionalak eta Edinburgoko Unibertsitateko museoek museoetan eta lorategi botanikoetan preskripzio kulturala abian jartzeko prestakuntza-ikastaro bat eskainiko dute. Asmoa da beste osasun-zentro, unibertsitate eta museo batzuek sarearekin bat egitea, preskripzio kulturala nazio-mailan sustatzeko eta nazioarteko mailan antzeko proiektuekin elkarlanean aritzeko.
PLATFORM IN DE MAAK
1. erronka
berrikuntza-ereduak KSIetako gobernantzarako nazioarteko politiketan
Erakunde
Harremanetarako pertsona
Eline Dewaele (dewaele.eline@gmail.com)
Jatorria
Platform In De Maak plataforma Barbara T’Jonck-ek, Eline Dewaele-k, Oihana Azpillagak eta Zoë Demoustier-ek sortu zuten, 2019an, arte eszenikoetako sortzaile hasiberriak aurkezteko plataforma gisa. Goi-mailak bihozgabetuta eta beren belaunalditik deskonektatuta sentitzen zirenez, testuinguru propio bat sortzea erabaki zuten, hautaketa artistikorik gabeko obrak antzezteko.
Trayectoria
2019an lehen jaialdia egin ondoren, Platform In De Maak erakundeko talde zentralak elkarrekin lan egiten jarraitu eta sortzaile hasiberrientzako aukerak garatu nahi izan zituen. Beren esperientzietatik eta gogoetetatik abiatuta, «antolatzen duena da programatzen duena» printzipioan oinarritutako antolaketa-egitura bat (bir)sortu zuten. 2019az geroztik, beste lau jaialdi antolatu dituzte eta bakoitzak aurrekoak baino irismen handiagoa eta jende gehiago lortu ditu.
Inpaktu positiboa
Plataforma 2019an sortu zuten, zenbait misio gogoan zituztela. Azken lau urteetan, misio guztiei eragitea lortu dute. Alderdi azpimarragarriak:
- Jaialdiaren lau edizio egin dira, 2019an, 2021ean eta 2022an, eta gero eta jende gehiago bertaratu da.
- 76 sortzaile aritu dira elkarlanean edo aurkeztu dituzte beren lanak.
- Aurkezteko plataforma izatetik garatzeko eta aurkezteko plataforma izatera pasatu da.
Artistek kudeatutako antolaketa-modu horizontalei buruzko elkarrizketetan presente dago: adibidez, Kunstenpunt, STUK eta Habitat Festival.
Hazkuntza eta lankidetza
Platform In De Maak-ek udal-finantzaketa gainditu du eta 2023ko irailean Flandriako Gobernuari eskatu zion proiekturako dirulaguntza bat. Dirulaguntza hori ezinbestekoa da misioan lan egiten jarraitzeko. Platform In De Maak-ek 18 hilabeteko garapen-ibilbidea sortu du (2023ko irailetik 2025eko martxora arte) 20 sortzaile hasiberrirentzat*. Bertan, sortzaileek beren alderdi artistikoa garatzeko eta beste antolaketa-gaitasun batzuk ikasteko aukera daukate. Ibilbidea arte eszenikoen jaialdi batekin amaitzen da, Lovainan. Ibilbide berrirako, Platform In De Maak-ek bere bazkideak eta irismena Flandria osoan eta Bruselan hedatu ditu.
*Sortzaile hasiberriak artistak edo argiztapen-teknikariak, koreografoak edo kulturako langileak, dramagileak edo eszenografoak, arte eszenikoekiko lotura duten diseinatzaile grafikoak, enpresa-zuzendarigaiak edo jantzi-diseinatzaileak eta abar dira.
EMPATHEATRE
1. erronka
berrikuntza-ereduak KSIetako gobernantzarako nazioarteko politiketan
Erakunde
Harremanetarako pertsona
Dr. Dylan McGarry (d.mcgarry@ru.ac.za)
Jatorria
Gizarte-desparekotasunez josita dagoen mundu batean, Empatheatre garai konplexu eta aldakorretarako babeslekua eta aterpea da, premiazko arazoei heltzeko ikuspegi berritzaileak eta sortzaileak eskaintzen baititu. 2014an sortu zen eta, haren ustez, desparekotasunak dituzten gizarteetan, herri-eztabaidak eta eztabaida politikoak polarizatuta egon ohi direnez eta ahots marjinatuei ez zaienez jaramonik egiten, funtsezkoa da ezagutzeko, izateko eta egiteko modu berriak arakatzea. Erakundeak entzute-modu desberdinak errazteko metodo sortzaile eta enpatikoak, askotariko jendearen arteko ezagutza-trukea sustatzen dutenak, defendatu ditu.
Ibilbidea
Erakundeak, bere ibilbidean, zenbait arazori egin die aurre, hala nola meatzaritzari eta biztanleriaren nahitaezko desplazamenduei, kaleko droga-mendekotasunari, emakume immigranteen kalteberatasunari, xenofobiari, gentrifikazioari eta etxebizitza publikoaren aldeko gatazkei, baita ondareari eta ozeanoen gobernantzari ere. Empatheatre-ren ikuspegia ekintzan oinarritutako ikerketa zabal batean funtsatuta dago. Talde sortzaileak funtsezko partaidekide eta bazkideekin elkarlanean dihardu justizia sozialerako interes kritikoko gaiak identifikatzeko, premiazko kontu nagusi batean ardaztuta. Prozesu horretan, ezinbestekoa da kontakizun anitz entzutea, irismen eta iritzi desberdinak arakatzea eta irismen zabaleko artxiboetan eta irakurketetan sakontzea. Erakundeak erakargarria, egokia eta errealitatearekiko fidela den antzerki-gidoi batean islatzen ditu ikerketaren emaitzak eta parte-hartzaileekin eta bazkideekin partekatzen du gidoia, haien iritziak biltzeko. Prozesu iteratibo horrek bermatzen du gidoiak sinesgarria izaten jarraitzen duela eta ordezkatzen dituen komunitateei eragiten diela. Orduan, Empatheatre-ko taldeak antzerki-produkzioa asmatzeari eta saioak egiteari ekiten dio. Produkzioa, berriro ere, zenbait eremutako ezagutza egokiak dauzkatenekin partekatzen da, eta horrek ikerketa aberasteko eta egiaztatzeko balio du. Proiektuko kolaboratzaileen onespena jaso ondoren, antzezpenak xede-talde estrategikoei aurkezten dizkiete, adibidez, arduradun politikoei, parte-hartzaileei eta ikusle interesatuei. Empatheatre-ren ikuspegiaren mamia antzezpenaren ondorengo elkarrizketetan datza, ikusleen, aktoreen eta dramagileen arteko solasaldi gisa antolatzen baitira zorrozki. Elkarrizketa horien bidez, beste ikerketa-geruza bat sortzen da, askotariko ikuspegiak eta iritziak partekatzen direlako.
Berez, inpaktua aldaketa sistematikora orientatuagoa dago, prozesuak, politikak, praktikak eta are legeria aldatuz. Gainera, antzerki-produkzioak, pelikulak eta beste komunikabide batzuetarako edukiak sortzen dira, zeinak produktutzat jo daitezkeen eta gizartean banakako inpaktu hezigarria eduki dezaketen.
Inpaktu positiboa
Empatheatre-ren irismena zabala izan da, egin dituen antzezlanak milaka afrikarrengana eta atzerriko beste ikusle batzuengana heldu dira eta. Produkzio horiek askotariko lekuetan antzeztu dira: antzerkietan eta arte-galerietan, baina baita eskoletan, elizetan, polizia-etxeetan, futbol-zelaietan, akuarioetan eta errehabilitazio-zentroetan ere. Egiptoko COP27 konferentzian, IPCCk klimari buruz antolatutako eta 2022ko azaroan egindako konferentzian, antzeztu dugu, FAOk Erroman duen egoitzarentzat antzeztu dugu eta prozesuak (eta lantegiak) zuzendu ditugu, 2023ko martxoan, eta Nazio Batuetako Batzar Nagusiarentzako lantegiak antolatu eta zuzendu ditugu, New Yorken, 2023ko ekainean. Gure antzezlanak eta pelikulak froga gisa erabili dituzte Hegoafrikako auzitegietan. Halaber, judizioz kanpoko ondorea eduki dugu, polizia-praktiken aldaketa bultzatu eta Durbanen toxikomanoentzako kalteak murrizteko lehen programaren sorketa sustatu baitugu, eta gatazkak eraldatu dituzten beste efektu asko lortu ditugu gure proiektuekin, sozietate zibileko zenbait erakunderekin eta abarrekin. Norbaitek gure ahaleginekin bat egin, parte hartu, dohaintzak egin edo informazio gehiago eskuratu nahi badu, www.empatheatre.com webgunea bisitatu dezake. Empatheatre-ren ibilbide apartak argi eta garbi erakusten du enpatiak, sormenak eta partaidetzazko justiziak gizarte-desparekotasunekin lotutako gizarte-erronkei aurre egiteko boterea dutela.
Hazkuntza eta lankidetza
Empatheatre nazioartean txalotu dute eta zenbait sari irabazi ditu, bai bere antzezlanengatik bai bere gizarte-inpaktuagatik. Nazioarteko birak egin ditugu, politikak aldatu ditugu, auzitegietarako frogak sortu ditugu eta oso gizarte-ingurune desberdin askotan gatazkak eraldatzeko babeslekuak eratu ditugu, baina gure erakundearen gastu orokorretarako eta funtzionamendurako baliabideak eta kapitala lortzeko borrokan dihardugu oraindik ere.
Horregatik, etorkizunerako gure helburua da gure funtzionamendu-gastuak estaltzen dituen eta talde iraunkor bat eratzea ahalbidetzen digun inbertsio sozial korporatibo bat lortzea, «proiektuz proiektu» jasotako finantzaketa atzean uzteko, erakundeekiko, udalerriekiko, gobernuekiko eta beste bazkide batzuekiko elkarte jarraitua bihurtzeko eta haiekin epe luzeko harremanak sortu ahal izateko, hain zuzen ere, ikerketak egiteko, auzitegiak sortzeko, hezkuntza-prozesu harberak garatzeko, narrazio publikorako eta erabakietarako babeslekuak eraikitzeko eta gure ikerketa garatzen eta zabaltzen jarraitzeko asmoz.
ECCOM
2. erronka
KSIetako politikak ebaluatzeko sistemak
Erakunde
Harremanetarako pertsona
Cristina Da Milano (damilano@eccom.it)
Jatorria
Kultura-sektoreari diziplina anitzeko ikuspegi berritzailea eman nahi zioten kulturako profesionalen talde batek sortu zuen ECCOM, 1995ean. Une hartako testuinguruan ia guztiz erakunde publikoen esku zegoen erakunde pribatua izanik, ikuspegi, ideia eta ezagutza berriak ekarri zituen balio gehigarri gisa. Proiektuan oinarritutako erakundea denez, kultura kudeatzeko ikuspegi bat sustatu zuen eta, aldi berean, inklusio sozial eta kulturala landu zituen, kultura-sistemaren balioa eta potentziala indartzeko asmoz.
Ibilbidea
ECCOM irabazi-asmorik gabeko elkarte gisa jaio zen. 2007an, sozietate mugatu bat sortu zen, ECCOM Progetti s.r.l. izenekoa, zerbitzuak garatzeko eta aholkularitza eskaintzeko. Haren eredu ekonomikoa tokiko, nazioko eta Europako deialdi publikoetako partaidetzan oinarrituta egon da, inoiz ez duelako eduki erakunde publikoen babes operatiborik. Curriculum bat sortzea eta proiektuak planifikatzeko eta kudeatzeko gaitasunak garatzea izan da zailena; bi alderdiok ezinbestekoak dira deialdien bitartez finantzaketa lortzeko. Pixkanaka, ECCOM ospe sendoa lortzen hasi zen, hasieran bere kide indibidualengan oinarrituta nagusiki.
Inpaktu positiboa
Urteetan zehar, erakundea ekonomikoki hazi da, zehazki eta etengabe, urteko fakturazioari, plantillako kideen kopuruari, kanpoko kolaboratzaileen kopuruari eta kudeatutako proiektuen kopuruari dagokienez. ECCOM erakundearen inpaktu sozial eta kulturala, adibidez, gure programa edo jardueretan parte hartu duten kulturako profesional askoren, gurekin lan egin duten ikasleen eta kulturarako sarbiderik eduki ohi ez duten komunitateen eraldaketari eta aldaketa handiari dagokienez areagotu da. Hori guztia, narratiba berrien bidez, ikuspuntu-aniztasunaren bidez eta kultura arteko ikuspen, esanahi eta ikuspegi berriak sortzeko xedea duten narrazio partekatuen bidez. Gainera, ECCOM sektorearen ikuspegi integratu bat sustatzen ari da, non ingurumen-kontuak funtsezko lekua betetzen duten: natura-ondarea eta kultura-ondarea harreman-sistema bakar eta integratutzat jo behar da.
Hazkuntza eta lankidetza
ECCOMek tokiko, nazioko eta nazioarteko harremanen sare bat garatu du zenbait motatako erakunde eta instituzioekin eta, horrela, elkarketa egonkor eta iraunkorrak sortu ditu zenbait sektoretan (ondare material eta immaterialaren sektoretik kultura-politiketaraino, hezkuntza eta gizarte-eragileak barne hartuta). ECCOMeko kideek hiri-berroneratzea, gizarte-berroneratzea eta kultura-berroneratzea xede dituzten zenbait jarduera eta esku-hartzetan aktiboki parte hartu dute, toki-komunitateekin batera sortzeko plangintzaren bidez, belaunaldi eta artista berriengan arreta berezia jarriz, iraganaren, orainaren eta etorkizunaren arteko zubi bat sortzeko gai diren prozesu berrien eta sorkuntza garaikide berrien abiarazleak direlako.
SORMEN INDUSTRIEN EBIDENTZIA ETA POLITIKA ZENTROA (CREATIVE PEC)
2. erronka
KSIetako politikak ebaluatzeko sistemak
Erakunde
Harremanetarako pertsona:
Professor Hasan Bakhshi MBE (hasan.bakhshi@pec.ac.uk)
Jatorria
2018an sortu zen Creative PEC zentroa eta AHRC Humanitateen Ikerketa Kontseiluak finantzatu zuen Erresuma Batuko Gobernuak 2017ko bere industria-estrategian sormen-industriekin hartutako konpromisoaren barruan. Datu independenteen kantitatean eta kalitatean erabateko eraldaketa egin zezala agindu zitzaion, datu horiek Erresuma Batuko sormen-industriei laguntzeko politiken oinarri izan zitezen. Industriarekin zituen lotura estuen bidez, hala nola industriaren defendatzaileen sarea eta zentroko ikertzaileek arduradun politikoekin erakutsitako inplikazioa, Creative PEC ikerketa-programa industriaren premia politikoekiko eta arduradun politikoekiko oso programa harkortzat jo izan da. Erantzuteko gaitasun horri esker, AHRC kontseiluaren beste bost urteko finantzaketa lortu zuen Creative PEC zentroak 2023ko ekainean.
Ibilbidea
Gauzatu zen lehenengo aldian, hamar unibertsitatetik eta berrikuntzarako Nesta fundaziotik zetozen ikertzaileen partzuergo handi bat bezala egituratu zen Creative PEC zentroa, haietako bakoitza zatikatutako izendapenekin, bakoitzak bere denboraren, esaterako, hamarren bat edo bosten bat Creative PEC programaren jarduerara eskainita. Zentroaren ezagutzen zabaltasuna izan zen akordio horren indarra. Haatik, partzuergoaren izaera zertxobait zatikatua zen proiektuaren ahulezia, eta Creative PEC zentroaren ikerketaren kudeaketa beharrezkoa zena baino zailagoa izatea eragiten zuen horrek. Ahulezia estruktural horri aurre egiteko, Creative PEC zentroaren zereginaren hurrengo fasean partzuergoko bazkideen kopuru askoz ere txikiagoarekin lan egin genuen (lau), baina gure helburuak betiere gure esperientziaren zabaltasuna atxikitzea –baita handitzea ere– izaten jarraitzen zuen, ikerketa-bekadunen mundu osoko sare berri baten bidez. Hasiera batean 2017ko Erresuma Batuko industria-estrategiaren bidez finantzatu bazen ere (ordezkatua izan da jada), AHRC kontseiluaren erreferentziazko aurrekontuaren bidez finantzatzen da orain Creative PEC zentroaren lehenengo arrakasten ondorioz: Erresuma Batuko sormen-industrien ikerketa-azpiegituraren funtsezko zatitzat jotzen da.
Inpaktu positiboa
Creative PEC zentroak hainbat esparru politikotan izandako ikerketak sarritan aipatzen dira Erresuma Batuko dokumentu estrategikoetan eta eztabaida parlamentarioetan. Adibidez, 2023ko ekainean argitaratutako gobernuaren «Sormen-industrien sektorearen bisioa» txostenak Creative PEC zentroaren 12 txosten aipatzen ditu 37 lekutan.
Hazkuntza eta lankidetza
Creative PEC zentroaren lanaren hurrengo fasean zentro bikoitzeko egitura bat sartu dugu, eta horren bidez, Ingalaterrako hegoaldean ezarritako gure baseaz gain (gaur egun Londresko RSA Royal Society of Arts elkartean), iparraldean ere ari gara zentro bat garatzen, Newcastleko Unibertsitatean. Lehen aldiz, ezagutzak trukatzeko gure ikuspegi «integratu» ezaugarria Ingalaterrako iparraldeko arduradun politikoekin aplikatzea ahalbidetuko digu horrek. Esperimentu bat bezala ikusten dugu. Iparraldeko gure zentroan arrakasta badugu, zentro hirukoitz edo laukoitzeko egitura bat garatu ahalko dugu hurrengo urteetan. RSA elkartearekin duen elkartze estrategikoa da Creative PEC 2.0 zentroaren beste ezaugarrietako bat. RSA elkarteak programa praktikoetan dituen indarrak Creative PEC zentroaren ikerketarako bikaintasunarekin konbinatzea espero dugu sormen-industrien garapenari begira planteamendu teoriko-praktiko bat aztertzeko, Nesta fundazioak esparru horretan izan dituen aurreko esperientzietan oinarrituta.
INDICEs
2. erronka
KSIetako politikak ebaluatzeko sistemak
Erakunde
Harremanetarako pertsona
Maria Tartari (Tartari.maria@gmail.com)
Jatorria
inDICEs 2020 Horizontea Europako programak eragina eman nahi die KSIei, institutuei eta arduradun politikoei digitalizazioaren inplikazio sozialak bete-betean ulertzeari esker jardun daitezen, kultura-ondasunak erabiltzeko ikuspegi berritzaileak sustatuz. Arreta irizpide berritzaileetara birbideratzea da funtsezko helburuetako bat, betiere plan estrategikoak diseinatzeko eta parte-hartzea neurtzeko, gizarteak aurre egin beharreko erronketan parte-hartze aktiboak duen inpaktuan oinarrituta. «Kultura 3.0» marko teoriko bati jarraikiz, matrize teoriko bat landu dugu, «Aldaketaren inpaktuaren ebaluazio-markoa», non nabarmendu egiten den lankidetzarako produkzioko, baterako egiletzako eta baterako transmisioko eredu berriak esparru digitaleko kultura-jardueren balioa sortzeko prozesuetan sartzearen garrantzia, eta horrek zer eragin izan dezakeen hainbat sektore eta estratutan.
Ibilbidea
Humanitateen, gizarte-zientzien, zuzenbidearen, JIIEen eta informatikaren alorretako sektore arteko 14 erakunderen partzuergo batek eta Europako alderdi interesdunen –hala nola kultura-ondarearen erakunde arduradunak, arduradun politikoak eta ikertzaileak– sare batek osatzen zuten inDICEs proiektua.
Parte-hartzaile guztiek lagundu zuten modu horizontalean, baterako gobernantza arin baten eta baterako sorkuntza digitaleko erreminten bidez, beren esperientziaren ekarpena egiteko eta proiektuaren helburuak baterako transmisioaren bidez lortzeko. Hain sektore desberdinetako eta itxuraz inkomunikatutako alorretako profesionalen arteko baterako prozesuak erronka izan dira eta, aldi berean, oso aberasgarriak.
Inpaktu positiboa
«Aldaketaren kudeaketa eta gomendio politikoak», proiektuaren emaitza nagusietako bat, kultura-balioko eta kultura-ondarearen inpaktua ulertzeko garatutako marko politiko bat da, kultura-digitalen baliabideak berrerabiltzeko kasu konkretuen bisioarekin batera: 452 erabiltzailek ikasi dute erreminta hori, arduradun politikoen, kulturaren profesionalen eta ikasleen artean guztira hartuta. «Aldaketaren inpaktuaren ebaluazio-markoa» erreminta kultura-ondarearen erakunde arduradunetako 163 erabiltzailek irakurri eta partekatu dute.
Hazkuntza eta lankidetza
Gaur egun, elkartutako erakundeen sare bat eraikitzen ari gara (esaterako, Boloniako museo zibikoen sarea eta berresteke dauden beste batzuk) proiektu pilotu espezifikoekin neurketa aplikatzeko eta inplementatzeko «Aldaketaren inpaktuaren ebaluazio-markoan» iradokitako estrategiaren arabera. Markoa probatuko da, adierazle espezifikoak garatuko dira eta emaitzak inDICEs komunitatearekin partekatuko dira. Gainera, parte-hartze kulturalari aplikatutako makrodatuen azterketaren emaitzen dibulgazio zientifikoa egiten ari gara.
CREADIS3 (Euskadiren kasua)
2. erronka
KSIetako politikak ebaluatzeko sistemak
Erakunde
Harremanetarako pertsona
Josean Urdangarin (lynx@euskadi.eus)
Jatorria
CREADIS3 espezializazio inteligenteko sormen-barrutiak proiektua lurraldeko politika publikoen agendak lerrokatzeko helburuarekin sortu zen KSI Kultura eta Sormen Industrien esparruan politika eraginkorragoak garatzeko, Europako sei lurraldetan berrikuntza eta garapen ekonomikoa sortzeko helburuarekin (2017-2021).Euskadiren kasuan, garapen ekonomikoko eskualde- eta lurralde-arloko estrategia bat, eta ikerketa eta berrikuntzako (I+B) ekimenak martxan jartzea izan zen hiru maila instituzionalen arteko lankidetza eta gobernantza modu «inteligenteagoan» (RIS3ren balioaren arabera) eta efizienteagoan indartzeko.
Ibilbidea
2017. urtea urte estrategikoa izan zen RIS3 Euskadi Sortzailea estrategiaren garapenean, lehen aldiz estrategia integral eta adostu bat planteatu baitzen KSIetarako, eta CREADIS3 Europako proiektuarekin batera gertatu zen denboran. Proiektuaren lehenengo fasearen ondoren (2017-2019), 2020-2021 aldia kritikoa izan zen, ezen prozesuak ez zuen orduan zertan hainbeste pentsatu tresna linealetan eta dimentsio anitzeko ereduetan pentsatzen hasi zen KSIen estrategiak garatzeko. Gure testuinguruan, 2020-2021 aldi horretan, hiru dimentsio lehenesten ditugu dagozkien ekintzekin:
- Berrikuntzaren bidezko KSIen kohesioari eta agerikotasunari buruzko 1. dimentsioa: BDCC Basque District of Culture and Creativity, 2020-2021 aldiko ezarpen pilotuarekin.
- Maila anitzeko gobernantzari eta elkar aberasteari buruzko 2. dimentsioa: KSI RIS3 talde pilotu estrategikoaren garapena helburuak eta proiektu espezifikoak dituzten lantaldeen bidez.
- Kulturaren eta sormenaren alorreko ezagutzaren eta kontzeptuzko garapenaren 3. dimentsioa: Euskadiko kulturako eta sormeneko finantzaketako eta gastu publikoko eragiketa estatistikoa.
Inpaktu positiboa
CREADIS3 proiektuak euskal KSIetan berrikuntza-politika bat garatzeko eta politika hori Europako beste bost esperientziarekin kontrastatzeko posibilitatea eman zigun. Dualtasun hori oso eraginkorra izan da eta proiektuaren hasierako espero ez ziren estrategia berrien garapena ahalbidetu du. Honako emaitza hauek eta inpaktu hau nabarmendu ditzakegu:
- CREADIS3 proiektuaren hiru helburuak lortu dira Euskadin: BDCC 2021eko uztailaz geroztik dago martxan, KSIen estatistika berriak daude sormen-industrietan eta Euskadi Sortzailea estrategiako zuzendaritza-taldearen eredu operatibo berriak (eta eraginkorragoak) ditugu.
- Proiektuaren espero ez ziren emaitzak: a) KSIgune (KSIen gunea) abiaraztea, euskal KSIen unibertsitate arteko klusterra; b) I+G+Bari buruzko garapen-lerro berri bat irekitzea (Contrast: KSI eta Berrikuntza 2021-2023); c) KSIak nazioartekotzeko lerroa birbideratzea eta indartzea.
Hazkuntza eta lankidetza
Ondo lotutako KSIen ekosistema bat sortu dugu Euskadin: 2021az geroztik gara DC Network sareko kide, berrikuntza-gaiak aztertzen dituzten 21 eskualde globalen nazioarteko sare batekin lan egiten dugu, EITren Kultura eta Sormen Partzuergoko kide gara, Interreg Europe programaren politika ikasteko plataformarekin aktiboki kolaboratzen dugu, eta pareen arteko berrikuntzak bultzatutako politikak garatzen dituzten eskualdeekin ere kolaboratzen dugu.
Arlo tematikoak
+
Antolatzaileak
Kolaboratzaileak
Koordinatzailea
